Legitaj libroj

Karaj legemuloj miaj, trovu malsupre liston de legitaj libroj. La ligiloj direktas vin al la plej bona rimedo (laŭ mi) por aĉeti la libron (plejparte al la libroservo de UEA, sed al senpaga elŝuto se mi scias pri ĝi).

2016

Mi ne notis ĉiun libron, kiun mi legis en 2016. Tial, ne konsideri tiun liston kompleta pro mia forgesemeco.

  • La Bona Lingvo (C. Piron)
    • Tiu ĉi libro estas klasikaĵo inter la multaj kleraj studoj pri Esperanto, kaj legenda libro por la Esperantisto. Estas interese kompari la lingvaĵon proponatan en tiu ĉi libro kun tiu de la “Ĉu-romanoj.”
  • Arne, la Ĉefido (L. Nordenstorm)
    • Bonega romaneto por komencantoj kaj infanoj. Libro pri la kristaniĝo de Skandinavio, de la vidpunkto de du infanoj amikiĝantaj.
  • La Fenomeno Esperanto (W. Auld)
    • Mallonga libro pri nia lingvo, kiu celas (per tradukoj) homojn ekster la ujo. Laŭ mia scio, la entrepreno de tradukado ne esperantistigis tiom da homoj, sed la libro povas helpi novajn Esperanto-parolantojn scii pli pri nia lingvo.
  • La Eta Princo (A. de Saint-Exupéry; Tradukis P. Delaire)
    • Tiu ĉi estas bonega traduko de la bunta francalingva libro, kiu estas amata de multaj homoj ekde infanaĝo.
  • La Ŝtona Urbo (A. Löwenstein)
    • Tiu ĉi historia romano, kvankam iel traduko el la angla lingvo, apenaŭ uzas neoficialajn radikojn (sed jes ja uzas dekojn da neoficialaĵoj), sed mi tute ne rimarkis la mankon de esprimpovo en la libro. Mi aparte ŝatis la priskribojn de kelta vivo kaj de vivo kiel sklavo en la Romia imperio. Plorigis min plurfoje.
  • Dek Prelegoj (K. Kalocsay)
    • Leginda libro. Mi forte rekomendas la unuan prelegon, kiu temas pri la vortfarado en Esperanto.
  • Ĉu vi kuiras ĉine? (C. Piron)
    • Belaspekta viro mortis, kaj dank’ al psikologio detektivo trovis la kulpulon.
  • Ĉu li bremsis sufiĉe? (C. Piron)
    • Arĥitekto mortis en pentrinda vilaĝo, kaj liaj malamikoj abundas.